LUCIANO MUST GET DI MESSAGE
We hope di Messenjah Luciano a feel better now after dat deh piece a
iron pipe beating whey him get. One ting wi know, him must get dat deh
message loud and clear sey Freckles did a look justice. One long year
a grudge spill over in a dat deh gas station. But a one ting wi vex
bout still, how come Luciano loyal soldiers dem run lef him. Not even
one fi stand up and defend him…no sah, dem deh soldier deh waan go
back a boot camp. But anex ting…people a ask a how de Messenjah love
gas station so?
THE BC PEOPLE TEK WAY REGGAE MONTH HYPE
What a way di BC people dem come in wid dem daggering ban and tek way
all a di lickle hype wha did puddong fi Reggae Month. It look like a
Cordell Green and Missa Dunn shoulda get Artistes a di Month fi
February, cause everytime we look a just dem we see all ova di place —
Reggae Month couldn’t even get in a lickle word sideways,
just because a di BC people dem. Misters Green and Dunn
and BC (Broadcasting Commission) to di werl!!!!!!
REGGA MONTH NEVA GWAAN
Dis year Reggae Month soft. Laas year everybody did deh pon fire and
did a praise up di a Reggae Month ting. A either di people dem who dem
a put inna some position nuh right fi di job, or no money nuh deh, but
sinting neva right. Everyting was secret — di free show inna New
Kingston Tuesday was a big secret and di awards is a bigger top
secret. And look how dem just dash way di film festival so.
We nah tell no lie, Reggae Month neva nice.
CHURCH PEOPLE FI CHECK DEMSELF
But a really tek di church people dem bout dance fi shut dung. Is hype
dem looking or what? When di crime rate a spiral outta control we nuh
hear dem a mek nuh big speech a call fi national week a prayer and
fasting, but dem quick fi jump pon dancehall bandwagon. If dance fi
lock off, den sidewalk church and prayer meeting fi lock dung to.
We love church people cyaan dun, but dem must talk wid sense.
Dem know how much people send dem pickney go school outta street dance selling
and how much a dat deh same money go back inna fi dem owna coffer..